Kusanyiko la madhehebu mbalimbali katika msitu wa kusini mwa Meksiko hivi karibuni lilikuja kuwa kanisa la Waadventista Wasabato, shukrani kwa kazi ya kujitolea ya mchungaji wa wilaya na mshiriki wa kanisa mlei ambaye aliendelea kuzuru mahali pa faragha na kujifunza Biblia na washiriki wa mahali hapo.

Kanisa jipya liko katika kijiji cha Nueva Unión, jumuiya ya wakaazi 500 iliyoko mita chache kutoka mpaka wa Guatemala. Kufika Nueva Unión si kazi rahisi, kwani inahusisha safari ya zaidi ya saa tano kutoka Palenque, Chiapas. Licha ya changamoto hizo, kila Sabato, kundi la waumini wa Kiadventista jasiri, wakiongozwa na mchungaji wa wilaya ya Nuevo Orizaba Ricardo Rodríguez, walifunga safari ya maili 25 (kilomita 40) ili kushiriki ujumbe wa Injili na jumuiya hiyo. Waliomba msaada wa mshiriki wa kawaida Vidal Pérez, ambaye alipata urafiki na Antonio Estrada, kiongozi wa kutaniko la madhehebu mbalimbali.

“Tulianza kuendesha mafunzo ya Biblia katika nyumba tano, kisha tukakutana na Antonio Estrada, aliyekuwa kiongozi wa kutaniko la Villa Unión kwa zaidi ya miaka kumi,” Pérez alisema. “[Estrada] aliniuliza maswali na akapokea majibu aliyoyahitaji. Muda si muda, alielewa ukweli kuhusu sheria ya Mungu, kanuni za kula, na Sabato, kwa kuwa aliona kwamba kila jambo tulilokuwa tukishiriki pamoja naye linapatikana katika Biblia.”

Baada ya kupitia masomo 20 pamoja na Vidal, Estrada aliwakusanya waumini wake na kuwaeleza Waadventista yale aliyokuwa amejifunza kutokana na mafunzo ya Biblia. Alisema kwa muda mrefu amekuwa kwenye harakati zake za kutafuta ukweli.

“Nilikuwa nimemwomba Mungu anitumie mtu wa kunionyesha ukweli,” akakumbuka Estrada. "Ilinichukua zaidi ya mwaka mmoja kujua ukweli huu, lakini nilikuwa na ndoto ambapo nilikuwa nimeona watu wawili wakija kunitembelea."

Baada ya hapo, washiriki wa kanisa walikubali kufanya mfululizo wa uinjilisti katika jumuiya, ambapo mwisho wake Estrada, pamoja na washiriki wengine, waliamua kujitolea maisha yao kwa Yesu na kujiunga na Kanisa la Waadventista.

"Nilielewa kwamba ukweli wa Sabato ni wa kibiblia na unahitaji kushirikiwa na wengine, hivyo jamii yangu na mimi tuligeukia Ukristo wa Waadventista baada ya zaidi ya miaka kumi ya kuwa sehemu ya madhehebu yetu ya awali," alisema Estrada.

Waumini wa zamani wa kanisa hilo lenye madhehebu mbalimbali, ambao sasa ni Waadventista, na washiriki waliowatembelea kwa zaidi ya mwaka mmoja pamoja na mchungaji wa wilaya waliungana na kupaka rangi na kuweka sehemu ya mbele ya kanisa lao nembo inayotambulisha makanisa ya Waadventista huko Chiapas. Na sasa, watu wanane zaidi wanajifunza Biblia.

Mnamo Novemba 9, 2023, jumuiya ilikusanyika kusherehekea sherehe rasmi ya uzinduzi wa kanisa jipya. Estrada alikabidhi funguo na nyaraka za kile ambacho kilikuwa kanisa lake kwa zaidi ya miaka kumi kwa viongozi wa Kanisa la Waadventista wa eneo hilo katika wakati wa kihistoria kwa kanisa katika eneo hilo.

Viongozi wa Waadventista kutoka Misheni ya Palenque na Unioni ya Chiapas Mexican walihudhuria sherehe hiyo, akiwemo Mchungaji José Luis Bouchot, katibu mtendaji wa Unioni hiyo. Wakati wa ujumbe wake, Bouchot alisema alifurahishwa na maendeleo na kuwahimiza washiriki kuwa nuru katika jumuiya yao na kugusa mioyo ambayo bado haijajisalimisha kwa Kristo.

Mchungaji Rodríguez, ambaye sasa anaongoza kutaniko jipya, alikiri kwamba kuna changamoto nyingi katika eneo hilo. “Lakini tuna furaha na shukrani kwa Mungu,” alisema, “kwa sababu hututumia kama vyombo vya kutimiza utume Wake mahali hapa, na kwa sababu tumepokea usaidizi tuliohitaji kushiriki zaidi upendo wa Yesu.”

Mchungaji René Flores, rais wa Misheni ya Palenque, alikubali. "Tunampa Mungu heshima na utukufu kwa sababu utume haukomi, kufikia hata maeneo ya mbali kama haya. Tutaendelea kufanya kazi ili kuleta tumaini katika sehemu za mbali zaidi za eneo letu lote.”

Mchungaji Bouchot alishiriki kwa nini anaona maendeleo haya kama tukio kuu katika historia ya Kanisa la Waadventista katika eneo hilo. Kulingana na yeye, haijatokea kwa bahati. “Haya ni matokeo ya uhusika kamili wa washiriki wa kanisa. Kilichotokea katika kusanyiko hili ni udhihirisho wa mwongozo wa Mungu wa kanisa Lake kupitia Roho Mtakatifu.”

Mchungaji Bouchot aliongeza kuwa alihisi kusukumwa sana kushuhudia matokeo ya kujitolea kwa waumini kufikia miisho ya dunia. “Iliniruhusu kuhisi tena kwamba nguvu za Mungu ni halisi. Yeye ndiye ambaye nimejitolea maisha yangu ya utumishi. Mungu ni mwema.”

Yosainy Oyaga na Marvin Bac walichangia hadithi hii.

The original version of this story was posted on the Inter-American Division website.