Licha ya kuongezeka kwa ghasia za magenge nchini Haiti wakati wa miezi iliyopita, ambayo imeathiri kwa kiasi kikubwa shughuli za kawaida za kanisa huko, juhudi za hivi karibuni za uinjilisti zimesababisha maelfu ya ubatizo, wasimamizi wa kanisa walisema.
"Athari za hali hii na shughuli na uendeshaji wa kanisa na taasisi ni kubwa," alisema Mchungaji Pierre Caporal, rais wa Yunioni ya Haiti. Nne kati ya nyanja tano za konferensi na misheni zimeathiriwa moja kwa moja, zikiwemo ofisi za makao makuu ya kanisa lililoko Delmas katikati mwa jiji la Port-au-Prince, Haiti.
Angalau makanisa 55 yamefungwa, alisema Caporal. "Idadi inaongezeka wiki baada ya wiki." Ofisi nyingi za shule na taasisi haziwezi kufanya kazi kikamilifu. "Wafanyikazi wa ofisi za yunioni kwa mfano wanaendelea kufanya kazi kutoka maeneo matatu tofauti," alisema. Caporal na viongozi wengine hufanya kazi kutoka manyumbani mwao au maeneo mengine ya karibu inapowezekana. Wanakutana kwenye jukwaa la Zoom na kuzungumza kwa njia ya simu ili kufahamishwa kuhusu maisha ya washiriki wa kanisa katika eneo lote na kujaribu kuwahudumia viongozi wao wa kanda iwezekanavyo, alieleza.
Mwishoni mwa Januari, watu wenye silaha waliingia katika kampasi ya Chuo Kikuu cha Waadventista cha Haiti huko Diquini, Carrefour, na kusababisha maafisa kuwatuma wanafunzi wao wa bweni nyumbani na kufunga chuo hicho kwa karibu wiki nne.
"Kuna zaidi ya familia 2,000 za Waadventista waliokimbia makazi yao, zikiwemo familia 18 za kichungaji, wasimamizi wa konferensi, na mamia zaidi ambao wamepoteza mali zao," alielezea Caporal. "Ninajali sana usalama wa washiriki wa kanisa letu, ambao wengi wao wameacha nyumba zao na wanaishi popote na kila mahali," alisema. Viongozi wa kanisa wanaona washiriki wengi wa kanisa na familia zao wakikimbia kutafuta usalama, huku vurugu na kutokuwa na uhakika ni sehemu ya maisha ya kila siku, alisema Caporal.
Makanisa ambayo yamefunguliwa kwa ibada ya Sabato hufanya hivyo kwa saa chache tu wakati wa alasiri ili kuruhusu muda wa kutosha kwa washiriki kurejea nyumbani kabla ya jua kutua. Wengine hukutana katika vibanda, manyumbani mwao, vyumba vya kukodisha, au nje. Wengine hutazama huduma za kanisa mtandaoni au kusikiliza Radio Esperance, kituo cha redio cha kanisa.
Baadhi ya makanisa makubwa ya Kiadventista yenye zaidi ya washiriki 800, kama vile Auditorium de la Bible, Temple No. 1 na Eben-Ezer—ambayo daima yamekuwa na huduma mbili kila Sabato—yamefunga milango yao. Hizo ndizo zio karibu zaidi na eneo la katikati mwa jiji karibu na ikulu ya kitaifa, ambapo mizozo ya kivita ni jambo la kila siku, viongozi wa kanisa walisema.
Usafiri wa umbali mfupi kutoka sehemu moja hadi nyingine si salama, alisema Caporal.
Katikati ya vurugu na changamoto kote, Mungu anaendelea kuwaangalia watu wake, alisema Caporal.
"Tunaona rehema za Mungu kila siku kwa niaba ya kanisa na watu wake," alisema. Kanisa limeona idadi isiyo na kifani ya watu wakibatizwa. Zaidi ya 4,000 wamebatizwa tangu mwanzo wa mwaka. Kuna baadhi ya maeneo ambayo ni mazuri zaidi kuliko mengine ambapo kanisa linaweza kuhudumu na kuleta marafiki na majirani zao kujifunza zaidi kuhusu injili. Makanisa 172 na makampuni 186 katika sehemu ya kaskazini ya taifa la kisiwa wanaweza kukutana mara kwa mara kila wiki.
Kwa ujumla, shauku ya injili bado ipo sana katika mioyo ya washiriki wa kanisa, alisema Caporal. Viongozi wa kanisa wamepanga siku nne za kufunga na maombi, Aprili 3-6, wakiomba ulinzi wa Mungu juu ya washiriki na nchi. Hii ni mara ya pili mwaka huu kwa siku za kufunga na maombi kuandaliwa kitaifa na Kanisa la Waadventista Wasabato nchini Haiti.
"Siku zilizo mbele yetu zinaendelea kuwa za wasiwasi, lakini kumtegemea Mungu ni jambo ambalo tutaendelea kufanya," Caporal alisema.
ADRA, (Shirika la Maendeleo na Misaada la Waadventista) nchini Haiti limekuwa likisaidia maelfu ya familia zilizokimbia makazi yao kwa chakula na mahitaji katika jumuiya muhimu nchini kwa miezi kadhaa sasa. ADRA Kimataifa na ADRA Inter-Amerika zinatoa programu na vifaa vya elimu kwa watoto katika jumuiya kadhaa kwa muda wa miezi miwili ijayo.
David Poloche, mkurugenzi wa ADRA wa Divisheni ya Inter-Amerika (Inter-American Division, IAD), alisema kuwa kampeni maalum ya uchangishaji fedha kati ya vitengo vya Huduma na Viwanda za Waadventista Walei (Adventist Laymen’s Services and Industries, ASi) katika eneo lote itanufaisha familia za Waadventista waliohamishwa nchini Haiti.
"Tunataka kuwasaidia washiriki wa kanisa kurudi nyumbani kwenye majimbo yao wakati itawezekana kuhamishwa na kuwasaidia kwa chakula na mahitaji ya kimsingi," alisema Caporal.
Kuna zaidi ya washiriki 500,000 wa kanisa walioenea katika konferensi tano na misheni huko Haiti ambazo zinasimamia makanisa na makutaniko 1,230. Yunioni inamiliki hospitali, zahanati kadhaa, chuo kikuu, na shule nyingi za msingi na sekondari.
Jean Carmy Felixon contributed information for this article.
The original article was published on the Inter-American Division website.