Mtoto Mattie Beacham mwenye umri wa miezi tisa alikuwa katika koma; viungo vyake vilikuwa vinakataa kufanya kazi, na mwili wake mdogo ulikuwa unapigana vita iliyokuwa ya kutisha. Alihitaji kupandikizwa ini, lakini alikuwa mgonjwa sana hata kuingizwa kwenye orodha ya kusubiri. Kwa wauguzi katika kitengo cha uangalizi maalum cha watoto (PICU) katika AdventHealth ya Watoto, iligeuka kuwa dhamira yao ya kuokoa maisha yake.
“Kulikuwa na wauguzi kadhaa ambao tuliweza kuona walikuwa wameguswa kihisia na Mattie na walikuwa tayari kupigana pamoja nasi,” alisema baba yake Mattie, Michael Beacham.
Michael na Allison Beacham walipomleta Mattie katika AdventHealth ya Waoto huko Orlando, programu pekee wa upandikizaji ini kwa watoto katikati mwa Florida, aligunduliwa kuwa na biliary atresia, ugonjwa adimu unaowapata watoto wachanga na husababisha nyongo kujikusanya na kuharibu ini.
“Miezi michache ya kwanza tulidhani kila kitu kiko sawa. Haikuwa hivyo; hatukujua,” alisema Michael. “Binti yetu alikuwa mdogo; binti yetu alikuwa na manjano. Hatukujua vizuri, na tulikuwa katika mfumo mwingine wa hospitali na hakuna aliyegundua.”
Regino Gonzalez-Peralta, daktari bingwa wa upandikizaji kwa watoto aliyekuwa anamtibu Mattie, alieleza kuwa takriban asilimia 80 ya watoto wachanga wenye ugonjwa huu watahitaji kupandikizwa ini hatimaye.
“Alikuwa anahitaji tu ini, lakini tulipaswa kumfikisha mahali ambapo angeweza kupata ini,” alisema Niki Sapp, mmoja wa wauguzi waliomhudumia Mattie.
Siku nyingine Mattie alionekana kuimarika. Kisha hali yake ilizorota ghafla—akaingia katika kushindwa kwa viungo, akaingia kwenye koma, na hatimaye moyo wake ukasimama, na kusababisha timu nzima ya madaktari, wauguzi na wataalamu wengine wa afya kukimbilia chumbani kwa Mattie.
“Mtoto wako anapopata matatizo makubwa na unaona watu 20 wakikimbilia chumbani kufanya CPR, hakuna mzazi anayepaswa kushuhudia hilo. Walikuja na mchungaji, wakaketi chini, na kusema hatavuka saa nne,” Michael alikumbuka. “Lakini baada ya saa nne bado alikuwa pale, na tuliona ni wajibu wetu kupigana kadri yeye alivyoendelea kupigana. Tulikaa tu pembeni ya kitanda na kuomba mambo yatulie.”
Timu iliweza kumstahimilisha.
“Ilikuwa mtihani mkubwa kwetu kama PICU. Lakini kama kuna kitu tunaweza kufanya, tutajaribu, na wakati mwingine tiba moja ambayo hatujawahi kufanya ndiyo inaweza kuokoa maisha yao,” alisema Sapp. “Ninajivunia kwamba nilichagua taaluma hii, kwamba mimi ni muuguzi.”
Kwa siku 180 ambazo Mattie alikuwa hospitalini, kila mmoja kati ya wauguzi 80 wanaofanya kazi katika kitengo cha uangalizi maalum kwa watoto alimshughulikia Mattie, hatua kwa hatua wakimsaidia kupata afya ili apate kupandikizwa.
Kesi yake ya kipekee na moyo wa kupambana wa Mattie na wazazi wake uliwasukuma kujaribu matibabu ambayo hawajawahi kufanya hapo awali—matibabu ambayo sasa yamekuwa utaratibu wa kawaida kwa watoto wengine.
“Mattie ameacha urithi huu na kusukuma mbele namna tunavyowahudumia wagonjwa hawa katika kile tunachofanya hapa AdventHealth for Children,” alisema Amanda Hellner, mwalimu wa wauguzi wa kitengo hicho wakati huo.
Hatimaye, Mattie alikuwa imara vya kutosha kurejeshwa kwenye orodha ya kusubiri upandikizaji.
Baada ya upasuaji wa saa 10, alipata upandikizaji wa ini uliokuwa na mafanikio.
Makala asili ilichapishwa kwenye tovuti ya habari ya AdventHealth. Jiunge na Chaneli ya ANN ya WhatsApp kwa sasisho za hivi punde za habari za Waadventista.
