Ibada ya kwanza ya asubuhi katika Kikao cha Konferensi Kuu cha 2025 (GC) huko St. Louis, Missouri iliongozwa na John Bradshaw, mkurugenzi na msemaji wa It Is Written, huduma ya vyombo vya habari ya Waadventista wa Sabato inayofanya kazi chini ya Divisheni ya Amerika Kaskazini (NAD).

Bradshaw alianza kwa kusisitiza nembo ya Kanisa la Waadventista wa Sabato, ambayo ina msalaba na Biblia iliyo wazi ikiwa na mwali wa moto unaotoka katika kurasa zake. Alizungumza kuhusu uchaguzi wa makusudi wa kutumia mwali wa moto kama ishara ya Roho Mtakatifu katika nembo hiyo.

“Ujumbe wetu ni muhimu sana, una nguvu na uhai kiasi kwamba njia bora ya kuuonyesha ni kwa kutumia miwali ya moto,” Bradshaw alisema. “Ujumbe huu utaliwasha ulimwengu mzima.”

Ibada yake ya asubuhi, iliyokuwa na kichwa “Kitabu,” ililenga kuwakumbusha wajumbe na wahudhuriaji kwamba Kanisa la Waadventista wa Sabato limejengwa juu ya mafundisho ya Biblia. Akirejelea unabii wa Biblia ulioko katika vitabu vya Danieli, Isaya, na Ufunuo, Bradshaw aliwasihi wajumbe watambue nafasi ya msingi ya Biblia katika maendeleo ya Kanisa la Waadventista wa Sabato.

Akitoa mtazamo mfupi kuhusu historia ya kanisa, Bradshaw alimtaja William Miller, mwanzilishi wa vuguvugu la Wamillerite, ambalo liliharakisha utafiti uliosababisha kuelewa kuhusu Yesu Kristo kuingia Mahali Patakatifu Zaidi katika hekalu la mbinguni.

“Tusilegeze msimamo juu ya imani za kimsingi,” Bradshaw alisema. “Zishikeni kwa nguvu, kwa sababu Shetani anataka muachie.”

Ibada yake ilihitimishwa kwa ukumbusho thabiti kwa wajumbe, washiriki, na watazamaji wa mbali.

“Ni fursa yetu kuwafanya watu wasikie ujumbe wa Biblia iliyo wazi iliyowashwa na Roho Mtakatifu,” Bradshaw alisema.

Ibada za asubuhi katika Kikao cha GC huanza kila siku saa 1:30 asubuhi kwa saa ya Kati ndani ya uwanja na kumalizika na kipindi cha maombi cha dakika 25 kwa wajumbe.

Kipindi cha maombi cha leo kiliendeshwa na Ramon Canals, katibu wa chama cha wahudumu wa GC, na mkewe, GC Aurora Canals, katibu msaidizi wa wahudumu.

Bradshaw ataendelea kuongoza ibada za asubuhi wakati wa kikao cha mwaka huu.

Tazama Kikao cha GC cha 2025 moja kwa moja kwenye Chaneli ya ANN ya YouTube na ufuatilie ANN kwenye X kwa taarifa za moja kwa moja. Jiunge na Chaneli ya ANN ya WhatsApp kwa habari za hivi punde za Waadventista.