Kupata mshtuko wa moyo ghafla nje ya kituo cha afya mara nyingi husababisha kifo, na wale wanaonusurika mara nyingi hubaki na madhara makubwa ya muda mrefu ya neva. Sasa AdventHealth na Kaunti ya Orange, Florida, nchini Marekani, wameungana kutoa matibabu ya kisasa ya kuokoa maisha kwa wagonjwa wa mshtuko wa moyo.

Ushahidi mpya umebaini kuwa matumizi ya CPR kwa kutumia mashine ya extracorporeal membrane oxygenation (ECMO) yanaweza kuboresha kwa kiasi kikubwa uwezekano wa kupona na kuhifadhi tishu za ubongo kwa wagonjwa baada ya kupata mshituko wa moyo. ECMO ni taratibu ambayo mashine hutumika kupitisha damu nje ya mwili, kuondoa kaboni dioksidi, kujaza damu hiyo oksijeni, na kuirudisha mwilini mwa mgonjwa. Damu hiyo hupita nje ya mapafu, au nje ya moyo na mapafu kwa pamoja, kutegemeana na hali ya mgonjwa. Timu ya kitabibu huweza kufanyia kazi moyo wa mgonjwa wakati mashine ya ECMO ikiendelea kuusustiri uhai wa mgonjwa.

Kaunti ya Orange imetangaza rasmi hospitali ya AdventHealth Orlando kuwa kituo kamili cha uokoaji wa moyo, maana yake ni kwamba timu za dharura za EMS za kaunti hiyo zitaleta wagonjwa wanaokidhi vigezo katika kituo hicho huku wakiendelea kuwapatia CPR ya kiotomatiki wakiwa njiani. Ili mgonjwa akidhi vigezo, lazima awe na umri kati ya miaka 18 hadi 70, asiwe na hali ya ugonjwa wa mwisho wa maisha (terminal illness), na awe ndani ya umbali usiozidi dakika 45 kutoka AdventHealth Orlando.

"Iwapo mtu atapata mshtuko wa moyo katika maeneo mengi ya Kaunti ya Orange, na akitimiza vigezo vya utaratibu huu wa kuokoa maisha, tutashirikiana kwa karibu na washirika wetu wa EMS na tutakuwa tayari AdventHealth Orlando kumpa nafasi kubwa zaidi ya kurejeshwa kwenye uhai," alisema Eduardo Oliveira, mkurugenzi wa kitabibu wa huduma za wagonjwa mahututi wa AdventHealth Central Florida.

"ECMO CPR ina uwezo wa kupunguza vifo vinavyotokana na mshtuko wa moyo wa ghafla, huku pia ikiboresha matokeo ya neva kwa wagonjwa wengi," alisema Christian Zuver, mkurugenzi wa kitabibu wa Mfumo wa Huduma za Dharura wa Kaunti ya Orange. "Bado tunatoa CPR ya ubora wa juu, tunafanya defibrillation mapema na kwa usahihi, na tunasaidia kupumua, lakini tunabadilisha jinsi wahudumu wanavyotambua hali za moyo. Wakitimiza vigezo vya ECMO CPR, basi shirika la EMS linaloitikia linajua kumpeleka mgonjwa kwenye kituo kamili cha uokoaji mara moja."

Mabadiliko haya yanajumuisha sayansi ya kisasa pamoja na sera na taratibu zilizopokewa kutoka mifumo mingine ya EMS inayofanya kazi kwa ufanisi duniani kote.

"Tumetoa mafunzo ya kina kwa watoa huduma kabla ya hospitali katika mfumo huu ili kuhakikisha kila shirika katika mfumo wa EMS wa Kaunti ya Orange linaelewa sababu ya mabadiliko haya na linajua la kuangalia wakati wa kuitikia mgonjwa," alisema Zuver.

AdventHealth ina mojawapo ya programu kubwa zaidi za ECMO nchini, ikiwa na vitanda 32 vya watu wazima, vitanda 10 vya watoto, wataalamu 28 wa ECMO, na zaidi ya wanachama 250 wa timu waliopata mafunzo maalum, wakiwemo watoa huduma wa ngazi ya juu, madaktari, wauguzi, wafamasia, wataalamu wa upumuaji, na wafanyakazi wa usaidizi. Mpango huu ulipata umaarufu kitaifa wakati wa janga la COVID-19, ukitibu wagonjwa huku ukizidi kwa kiasi kikubwa wastani wa kitaifa wa kiwango cha kupona.

Mpango huu ulizinduliwa mwishoni mwa Machi, ukifanya kazi kuanzia saa 1:00 asubuhi hadi saa 1:00 usiku. Mara tu wafanyakazi wa ziada watakapopata mafunzo, mpango huu utaongezwa hadi upatikane saa 24 kwa siku, siku saba kwa wiki.

Makala asili ilichapishwa kwenye tovuti ya habari ya AdventHealth. Jiunge na Chaneli ya ANN ya WhatsApp kwa sasisho za hivi punde za habari za Waadventista.