Programu ya Kikao cha Konferensi Kuu ya Waadventista cha mwaka 2025 sasa inapatikana kwa wajumbe na washiriki kupakua wanapojiandaa kwa Kikao cha GC cha 62 kitakachofanyika kuanzia Julai 3–12, 2025, huko St. Louis, Missouri.

“Hiki kwa kweli ndicho Kikao cha kwanza cha GC kinachozingatia matumizi ya kidijitali tangu mwanzo, na programu tumishi hii ndiyo kiini cha uzoefu huo,” alisema Sam Neves, naibu mkurugenzi wa mawasiliano wa GC.

Kikao cha awali, kilichofanyika mwaka wa 2022, kilikuwa tukio la mseto (la ana kwa ana na mtandaoni) lililoanzisha toleo la kwanza la programu tumishi ya Kikao cha GC. Hata hivyo, toleo hilo lilijengwa juu ya jukwaa la hafla la wahusika wa tatu, jambo lililosababisha uzoefu mdogo kwa watumiaji.

“Kwa kikao cha mwaka huu, tulitaka uzoefu bora zaidi,” alisema Neves. “Hiyo ilimaanisha kuwekeza muda wa kuendeleza programu yetu wenyewe.”

Kuanzia Agosti 2024, kwa ushirikiano na IAtec (Taasisi ya Teknolojia ya Waadventista) huko Hortolândia, São Paulo, Brazil, GC ilitengeneza programu yake mwenyewe iliyoundwa kwa ajili ya kutumika tena katika vikao vijavyo na matukio mengine ya Kanisa la Ulimwenguni.

IAtec, ambayo kituo chake kina zaidi ya watengenezaji 300, ilifanya kazi ya kutekeleza mpangilio na muundo wa kisasa, kuendeleza jopo la wavuti la utawala, na kuunda muundo unaoweza kutumika tena.

Uboreshaji wa Programu

Programu hiyo iliyobuniwa upya ina muonekano wa kisasa wenye mpangilio mpya wa rangi, skrini ya mwanzo inayoonyesha Mnara wa St. Louis na nembo ya Kikao cha GC 2025.

Daniel Bogdanov, mkurugenzi msaidizi wa Mawasiliano wa GC na meneja katika mradi huo, alisisitiza umuhimu wa utendaji wa mtumiaji.

“Tuliunda programu hii tukiwazingatia wajumbe pamoja na wageni,” alisema. “Usogezaji, hasa kuzunguka vibanda vya maonyesho, ulikuwa changamoto kubwa mwaka 2022. Safari hii, hilo ni jambo la kipaumbele.”

Programu hiyo sasa inapatikana kwa kupakuliwa kwenye vifaa vya iOS na Android. Inafanya kazi kwa Kiingereza pekee, lakini utiririshaji wa moja kwa moja na masasisho ya habari ndani ya programu hiyo yatapatikana kwa Kiingereza, Kihispania, Kireno, Kifaransa, na Kirusi.

Vipengele na Upatikanaji

Sabrina De Souza, mweka hazina msaidizi wa Konferensi Kuu (GC) na kiongozi wa maendeleo ya programu hiyo, alisema kuwa madhumuni ya toleo lililoboreshwa la programu ni kurahisisha na kuboresha uzoefu wa Kikao cha GC.

“Programu hii itawapatia wajumbe, wageni maalum, na washiriki wa kawaida taarifa zote muhimu katika jukwaa moja rahisi kufikiwa, na hivyo kuboresha usogezaji ndani ya tukio pamoja na katika jiji linaloandaa kikao,” alisema De Souza.

Maboresho kulingana na maoni ya watumiaji kutoka kikao cha 2022 ni pamoja na:

• Orodha ya mikahawa ya eneo hilo

• Ramani ya tukio kamili

• Ratiba za vikao vya kina na utendaji wa arifa

• Matokeo ya upigaji kura moja kwa moja

• Profaili za wazungumzaji na wanamuziki

• Kanuni za utaratibu kwa mikutano

• Maelezo ya vikao vya maombi

• Taarifa za vikao vya biashara

• Mawasiliano ya dharura

• Upatikanaji wa matangazo ya moja kwa moja

• Sehemu ya Maswali Yanayoulizwa Mara kwa Mara

Sehemu mpya ya “Biashara” katika programu, inayopatikana chini ya kichupo cha ‘Zaidi’, inahifadhi matokeo ya upigaji kura, ufikiaji wa kanuni za kanisa, na hati za katiba. Hivi ni nyenzo muhimu kwa ajili ya mchakato wa uendeshaji wa kikao kinachoendeshwa na wajumbe.

Wajumbe wa Kikao cha GC ni wawakilishi wa kanisa kutoka kote ulimwenguni wanaokutana ili kupiga kura kuhusu sera, uongozi, na mwelekeo wa kimkakati wa Kanisa la Waadventista wa Sabato la Ulimwenguni kwa kipindi cha miaka mitano ijayo, ikiwa ni pamoja na kumchagua rais wa kanisa hilo la kimataifa.

Maandalizi ya Mapema

Ingawa kikao hakitaanza hadi Julai 3, 2025, Bogdanov anashauri wale watakaohudhuria kupakua programu hiyo mapema iwezekanavyo ili kuanza kupanga usafiri kutoka uwanja wa ndege, chakula, na ratiba ya kikao.

“Hakuna haja ya kuunda akaunti ili kutumia programu; tafuta tu ‘GC Session 2025’ katika duka lako la programu, bonyeza pakua, na anza kuperuzi programu hiyo,” alisema Bogdanov. “Hata kama hautakuwepo kimwili, programu hii itakuwezesha kupanga ratiba yako kwa kuchagua matukio yanayorushwa moja kwa moja.”

Kadri kikao cha 62 cha Konferensi Kuu kinavyokaribia, wale walioshiriki katika utengenezaji na uundaji wa programu hiyo wanaomba Mungu aitumie kuboresha uzoefu wa wahudhuriaji na wajumbe.

Kwa maelezo zaidi kuhusu Kanisa la Waadventista wa Sabato na kikao kijacho, tembelea http://www.gcsession.org. Jiunge na Chaneli ya WhatsApp ya ANN kwa habari za hivi punde za Waadventista.