Sahmyook Foods, kampuni ya chakula ya Waadventista wa Sabato nchini Korea Kusini, inatoa msaada na usaidizi kwa familia zilizofiwa katika ajali ya ndege ya Desemba 29 katika Uwanja wa Ndege wa Kimataifa wa Muan. Shule ya Waadventista ya eneo hilo, ambayo ilipoteza wanafunzi wawili katika ajali hiyo, pia inaandaa kumbukumbu maalum za kuwakumbuka marehemu.

Kufikia Desemba 31, maafisa wanaendelea kutambua wahanga wa ajali ya ndege, ikiwa ni pamoja na wale ambao walikuwa washiriki wa Kanisa la Waadventista wa Sabato na wale waliokuwa na uhusiano mwingine na kanisa hilo.

Kufikia saa 10:00 jioni Desemba 31, inaeleweka kuwa wanafamilia watatu, Bw. na Bi. Kim na mwanao, mfanyakazi wa Sahmyook Foods ambaye pia alihudhuria Kanisa la Waaadventista wa Sabato la Kimataifa la Gwangju, walikuwa kwenye ndege hiyo. Imeripotiwa kuwa ingawa miili imetambuliwa, bado haijatolewa kutoka kwenye mabaki ya ndege hiyo.

Ndugu wawili waliokuwa katika gredi ya pili na ya tatu ya Shule ya Kati ya Honam Samyuk, pia walikuwa kwenye ndege hiyo pamoja na wazazi wao.

Mshiriki wa kanisa la Gwangju Light pia alipoteza maisha. Alikuwa mzazi wa mwanafunzi katika Shule ya Msingi ya Gwangju Sahmyook. Aidha, shemasi anayeishi eneo la Jangseong alipoteza kaka yake katika ajali hiyo ya ndege.

Msaada kwa Familia Zilizofiwa

Sahmyook Foods, ikiongozwa na Mkurugenzi Mtendaji Kwang Jin Chon, inatoa msaada na ufuatiliaji kwa wanafamilia zilizofiwa. Wasimamizi wa Sahmyook Foods walieleza huzuni yao kubwa na rambirambi kwa familia na wanajadili jinsi ya kuwasaidia vyema, hasa wale walio na uhusiano na kampuni hiyo.

Kwang, ambaye alisikia habari hizo wakati wa kuhudhuria mkutano mkuu wa Konferensi ya Middlewest Korea, alikimbilia mara moja kwenye eneo la ajali katika Uwanja wa Ndege wa Kimataifa wa Muan ili kuwafariji familia zinazokuwa na huzuni.

Sahmyook Foods iko Gwangju. Kupitia msambazaji wa kampuni katika eneo la Jeonnam na kibanda cha tawi la Honam la ADRA Korea, ambalo linafanya shughuli za kujitolea kwenye uwanja wa ndege, waliweza kusambaza vitu muhimu kama vile maziwa ya soya. Aidha, wafanyakazi walitumwa kusaidia familia zilizofiwa.

Mnamo Desemba 31, Kwang alitembelea Jumba la Jiji la Cheonan kutoa rambirambi zake. Imeripotiwa kuwa mfanyakazi wa Sahmyook Foods aliyepoteza maisha alikuwa ndiye mshiriki pekee wa Konferensi ya Middlewest Korea kati ya wahanga 179.

Sahmyook Foods iliweka bendera ya kumbukumbu ndani ya kituo cha kampuni, na wafanyakazi wote walitembelea ofisi ya tawi la pamoja la Cheonan kuwakumbuka marehemu. Aidha, kampuni inapanga kuwasiliana na wadau kujadili taratibu zaidi na hatua za kurekebisha.

Ikiongozwa na mkuu Young Dug Ko, Shule ya Kati ya Honam Sahmyook iliweka chombo cha uvumba kwenye kampasi yake kuwakumbuka wanafunzi na wazazi wao waliopoteza maisha katika ajali hiyo. Nchini Korea Kusini, kuchoma ubani ni desturi ya kawaida wakati wa sherehe za kijamii, kidini, na za kitaifa.

“Tunajiandaa kuweka chombo cha ubani kwenye kona ya uwanja wa michezo,” viongozi wa shule walisema. “Tunapanga kukiendesha kuanzia kesho (Jumatano, Januari 1) hadi Jumamosi (Januari 4). Kitafunguliwa kila siku kutoka saa 3:00 asubuhi hadi saa 1:00 jioni siku za kazi na hadi saa 12:00 jioni Jumamosi ijayo.”

Viongozi wa shule waliongeza kuwa “ushauri maalum utafanyika kwa wanafunzi na walimu wanaohuzunika kwa kupoteza marafiki na wanafunzi wao wapendwa.” Ofisi ya Elimu ya Jiji la Gwangju inasaidia kikamilifu mpango huo.

Mipango ya mazishi inasubiri kwani miili yote bado haijapatikana. Itakapopatikana, itapelekwa katika Hospitali ya Chuo Kikuu cha Kitaifa cha Chonnam Hwasun.

Makala asili ilichapishwa kwenye tovuti ya habari ya Konferensi ya Yunioni ya Korea.