Wakati wa kikao cha mchana cha shughuli za kibiashara tarehe 3 Julai 2025 katika Kikao cha 2025 cha Konferensi Kuu (GC) huko St. Louis, Missouri, mjumbe mmoja alitoa hoja ya kuongeza katika ajenda mapitio na majadiliano yanayohusiana na taarifa ya GC ya mwaka 2015 kuhusu chanjo. Wajumbe walipiga kura kupinga hoja hiyo.
Hoja hiyo, iliyoletwa na mjumbe Yuliyan Filipov kutoka Konferensi ya Ohio ya Divisheni ya Amerika Kaskazini, ilisomeka:
“Kuongeza kwenye ajenda mapitio na majadiliano ya taarifa ya 2015 ya Kamati ya Utawala ya Konferensi Kuu kuhusu chanjo, hasa madai yake kuhusu maandiko ya kisayansi yaliyopitiwa na wataalamu (peer-reviewed scientific literature) pamoja na Biblia na maandiko ya Ellen G. White.”
Filipov alieleza wasiwasi wake kuwa kanisa lilikuwa linaelekea kwenye mapokeo ya kibinadamu badala ya mafundisho ya Kibiblia.
Mwenyekiti wa kikao hicho cha biashara na makamu wa rais mkuu wa GC, Artur Stele, alifafanua kuwa hoja ya Filipov ilikuwa inapendekeza marekebisho kwenye hoja ya awali iliyokuwa mezani kuhusu kupitisha ajenda ya kikao kama ilivyowasilishwa awali.
Mjumbe wa GC ambaye ni mjumbe wa kudumu, Amireh Al-Haddad, ambaye ni mkurugenzi wa Masuala ya Umma na Uhuru wa Kidini wa Divisheni ya Amerika Kaskazini katika Yunioni ya Kusini, alitumia uzoefu wake wa miaka mingi akifanya kazi katika eneo la chanjo, akibainisha kuwa hakuna ombi la kupewa msamaha wa kidini kuhusu chanjo lililowahi kukataliwa, bila kujali kauli za kanisa kuhusu chanjo.
“Hatujawahi kuwakataa wale wanaotoa pingamizi za kidini kwa uaminifu. Tunaendelea kuwasaidia watu ambao hatukubaliani nao kwa sababu uhuru wa kidini unakupa haki ya kuwa na imani ya kibinafsi tofauti,” Al-Haddad alisema.
Mjumbe mwingine alieleza wasiwasi tofauti akisema kuwa kuzingatia marekebisho hayo kungehitaji utafiti na maandalizi zaidi.
“Ninapinga kupokea marekebisho haya kwa sababu suala hili linahitaji kusomwa kwa kina kabla ya kuliweka kwenye ajenda,” alisema Niklas Rantanen kutoka Konferensi ya Yunioni ya Makanisa ya Finland ya Divisheni ya Trans-Ulaya.
Mwezi Aprili 2015, Kamati ya Utawala ya GC ilipiga kura kupitisha taarifa inayothibitisha matumizi yenye uwajibikaji wa chanjo kama kipimo cha afya ya umma. Msimamo huu uliimarishwa tena Oktoba 25, 2021, wakati wa kupeanwa kwa chanjo za COVID-19 duniani kote. Ingawa taarifa hiyo inahimiza kuchanja, inasisitiza kuwa uamuzi wa mwisho unabaki kwa mtu binafsi.
Kabla ya upigaji kura kuanza, rais wa GC Ted Wilson aliwahutubia wajumbe, akionya dhidi ya upotoshaji wa habari ndani ya kanisa.
“Ndugu zangu, ningewaomba msijihusishe na mbinu za njama (conspiracy approaches),” Wilson alisema. “Kudai kwamba GC na kanisa la dunia linapokea maagizo na liko chini ya kidole cha Umoja wa Mataifa ni uongo kabisa.”
Marekebisho haya yalipigiwa kura na kukataliwa kwa kura 310 dhidi ya 1,662.
Taarifa hiyo, ya tarehe 25 Oktoba 2021, iliandikwa kwa ushirikiano na uongozi wa Konferensi Kuu (GC), Taasisi ya Utafiti wa Kibiblia (BRI), Huduma za Afya za Waadventista, Idara ya Masuala ya Umma na Uhuru wa Kidini, Ofisi ya Mshauri Mkuu wa Sheria wa GC, na Loma Linda University Health.
Kwa maelezo zaidi kuhusu Mkutano Mkuu wa 2025, tembelea: http://www.gcsession.org. Jiunge na Chaneli ya WhatsApp ya ANN kwa habari za hivi punde za Waadventista.
